港足隊噚日復操，爭取衞冕月底嘅省港盃；不過，操練就唔齊人，除陳肇麒同梁振邦冇到之外，曾至孝、張健峰同林嘉緯等傑志兵因外遊唔見人，得番養緊傷嘅陳文輝撐場。主教練金判坤收操後放料，因為廣東方面反對港隊再用未有特區護照嘅球員，所以港隊一班申請緊護照嘅外援好似安基斯就冇入選，反而選咗張志勇（右）同葉頌朗等年輕人入隊，準備過兩年換血鋪路。另外，金帥透露明年會安排5至6場國際賽，對手希望排名高過香港，最好有中國同西亞球隊，咁先可以攞到分，幫香港提升世界排名喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange