上星期四（十一月廿八日）返到中大參加大學展覽廳開幕禮，展覽廳設於中大圖書館正門入口左側，建設地下層，共佔地約六千平方呎，地方不算大，但設計及建造裝修幾講究，配以尖端電腦科技，都係要錢建設嘅，錢就由郭得勝基金包起，故此在展覽廳入口就有一塊紀念牌，由中大校長沈祖堯、中大50周年校慶督導委員會主席梁英偉、郭得勝先生嘅公子郭炳聯及千金郭婉儀一齊揭幕。更有意思嘅係，新鴻基地產內有不少管理高層及主管皆中大畢業生，資深嘅有陳鉅源、黃奕鑑、雷霆，總經理級、經理級人員眾多，是日郭炳聯先生特別叫埋十幾個中大校友一齊回到中大參加開幕禮，幾有意思。
據郭炳聯先生致辭時講：
「先父郭得勝先生與中大有很深淵源，爸爸少年時由於生活困苦，只讀了幾年書便無法繼續學業，十六歲即投身社會拼搏，但他深信教育的重要，在1977年，便與幾位商界朋友，在當年擔任中大司庫的利國偉博士穿針引線下，開辦了中大夜間三年制工商管理碩士課程，後來更一起捐錢為中大設立了課程中心。
先父對教育的支持，深深感染了我。我作為中大校董已有19年，做校董會副主席亦有14年。而新鴻基地產及家族基金，亦一直通過設立獎學金及資助各項學術活動同講座支持中大。這些講座，我幾乎每次都參加，獲益良多……」
「大學展覽廳」五個大字，由退休金耀基校長題字，金公書法了得，五個大字氣勢雄偉，好吸引眾人入內參觀，各中大校友有空不妨回校入內一看，公眾人士亦歡迎，睇睇三間由窮書生/文人學者創辦嘅窮書院，如何成長成為中文大學及擴展到大學下面有九間書院嘅歷程，睇完就知道成果得來不易，前人辛勞不少。
今日十二月四日中大有好多活動舉行，晚上有海外回來校友聯誼晚會，下午二時許有「史前」畢業生，皆50年代末、60年代初畢業嘅，即熊翰章、李乃元（崇基）、列航飛、李金鐘（新亞）、何萬森、高譚根（聯合）在康本國際學術園7號演講廳（火車站對面）講中大的前世及誕生。有興趣校友大可先到展覽廳參觀，然後到場聽幾位「真正老鬼」講古仔！