魔童王維基的香港電視開台不成，近日無綫更成功申請註冊「無綫台徽+HKTV」及「無綫台徽+香港電視」商標，擺明對港視步步進逼。而港視最後一部電視劇《Night Shift》前晚在紅磡舉行煞科宴，現場筵開12圍，台前幕後都畀面出席，林文龍更闊綽拿出5位數字給大家抽獎，而原本忙於開會的王維基中途加入飯局，並與眾演員傾談。
感受公司凝聚力
而現場大會安排印有HKTV的宣傳貼紙給藝人貼上，但林文龍為怕混淆，加上避免間接為其他電視台宣傳，故就抵死不肯貼。事後林文龍說：「講笑啫，我想問清楚係乜嘢一回事，相信好多人都覺得好奇怪，點解會咁？最摸不着頭腦呢樣嘢，點解𠵱家先嚟申請，全香港700幾萬人都知，TVB就係TVB，登記HKTV係乜嘢一回事，真係唔明白。等如香港電視特區政府唔批牌，都冇reason畀我哋，都係等大家估，如果TVB登記呢個名冇解釋，咪又係大家估吓。」有指TVB似挑戰港視，林文龍就表示港視連牌都沒有，不需要挑戰，不過他就大讚雖然自己在港視不是很久，但已感受到公司的凝聚力。
而林嘉華對於無綫申請註冊「HKTV」，他說：「有聽聞，𠵱家理解咗，太多嘢唔明白，王生都申請咁耐，點解又唔批佢？但TVB 3、4月時申請又批咗呢，真係唔明，世界太多不解之謎，唔好理佢點解，大家唔會知，覺得怪啲。」反而他對自己的去向就表現得故弄玄虛，並反問說：「如果我話我響應愛回家，大家會有乜反應？其實我2006年回流返嚟香港做嘢，都一直響應愛回家，但要執正字眼，我愛回家係加拿大個加，要聽清楚，我之後會返加拿大。」
採訪：卓寶花 攝影：黃偉雄
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013