一隻殼究竟值幾錢？主板講緊3億銀樓上，隨着中證監收緊借殼上市條件，內地公司要借殼，幾乎肯定是來港尋寶，有上市公司高層坦言，本地殼現時極為渴市，明年隨時炒到5億元一隻。殼股持續瘋炒，絕非空穴來風。
扑中一隻殼股，可以幾日賺一倍，上月初推介的乾隆科技（1236）為好例子。今日再揀隻滄海遺珠畀大家──品質國際（243）。
集團主要係做集成電路、散熱器等等，跟嘉利國際（1050）、CEC國際（759）一樣為傳統工業股，後兩者成功發掘新業務，齊齊殺出重圍，股價「太空漫遊」，品質國際絕對有機成為翻版。再者，目前市值僅2.69億元，殼價有找，齋炒呢個概念都夠殺！
去年9月，集團曾訂立意向書收購資產，反映有意轉型大變身，但今年9月宣佈告吹。但股價並無因此消息而急插，反而緩緩上爬，至10月尾更發力向上突破，魏力估計有兩個可能性：一、集團正傾緊另一單大刁，準備收購其他資產；二、老闆放棄業務，將隻殼善價而沽。無論最後開邊瓣，呢個價點都值博。睇業績，過去三年均處微蝕狀態，半導體業務未見起色，賣殼誘因甚大；淨負債比率僅17%，盤數簡單乾淨，脫手不難。趁股價處於整固階段，不妨先下一注，跌穿0.32元止蝕，反之突破0.4元加注，博一倍是合理期望。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange