「賭王」何鴻燊上星期啱啱慶祝完92歲大壽，開心嘢當然唔好畀佢停，佢位愛將、澳博（880）行政總裁蘇樹輝（Ambrose）家有喜事，佢將於呢個星期日娶新抱，仲講到明想快啲有個孫仔抱呀！
Ambrose喺澳門經營賭業幾十年，佢位公子蘇文藻冇跟阿爸搵食，2000年喺美國普林斯頓大學畢業，主修電腦科學，2007年喺史丹福大學讀完博士課程，𠵱家喺中文大學系統工程與工程管理學系做副教授。據聞未婚妻都係喺中大結識，所以佢哋周日中午會喺中大崇基學院禮拜堂行禮，晚上喺灣仔會展擺酒。
華華噚日打電話畀Ambrose恭喜佢就快榮升老爺，佢難掩興奮心情，話家陣忙住幫手編排婚宴座位表，仲恨抱孫恨到出面，笑住話「做老爺梗係恨抱孫𠺢啦！越早越好喇！」
佢話，阿仔同未來新抱已經知佢想抱孫，佢打算擺酒當晚，再喺賓客面前落柯打，希望以群眾壓力逼呢對新人努力造人。
賭王四太「戥老友開心」
Ambrose話，周日喺會展擺幾十圍，佢主要邀請多年好友，賭王、四太梁安琪當然有份，「緊要通知喇，老細嚟㗎嘛！」。四太都話替老友兼拍檔Ambrose開心，希望一對新人可以好似Ambrose兩公婆咁恩愛。
Ambrose喺香港同澳門都有頭有面，問佢會否喺澳門再擺酒，佢就話阿仔同未來新抱唔係生意人，簡簡單單喺香港擺酒高興吓就算嘞。
李華華
mailto:[email protected]
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24