張志剛日前喺《明報》撰文，指香港政制改革，唔可以單靠實行政黨政治，就可以解決目前政制內部矛盾，基本法冇規定特首不能有政黨背景，係行政長官選舉條例本地立法時加入有關限制。若果要實行政黨執政，當然唔係求求其刪除有關限制就ok，必須全面研究政黨在整個權力架構中嘅角色。
首先，根據基本法，特首同立法會係分開選，形式上接近美式總統內閣制，如南美及台灣，而非英國西敏寺模式，英國係選舉勝出議會多數黨組閣執政，行政立法之間由執政黨去連繫，確保行政機關意志得到貫徹。美式總統內閣制，議會不一定由總統所屬政黨控制，克林頓年代便出現共和黨控制國會，形成對峙局面。
政黨政治非萬能
由於特首經直選投票產生，其政綱得到民意授權，入閣成員不論黨派背景，都要支持呢個核心執政綱領，所以唔會出現張志剛擔心張建宗推工會政綱、內閣親商界工商局長反對嘅情況。而且美式總統內閣閣員，唔一定來自同黨，反而更多求自智庫、學術界、財經商界。而黨派主要角色在於黨團領袖，奧巴馬第一任總統任期根本靠國會民主黨領袖佩洛西做盲公竹。總統亦唔一定指得郁同黨黨團，反過來兩黨黨團協商可以反壓總統。
台灣總統馬英九要清除立法院同黨領袖立法院長王金平，就係因為當選年多以來，行政院重大提案均無法在立法院通過，明明國民黨佔議會多數，但領袖王金平認為提案要兩黨黨團協商有共識先上，被視為討好反對派民進黨，呢個案例顯示總統內閣制下，議會亦唔一定事事跟從總統指示，一切視乎政客專業程度。即使成熟如美國，最近政府冇錢開工，就係因為共和黨被黨內少數派茶黨騎劫，意圖一舉推翻奧巴馬醫療改革，形成惡性政爭。
如果曾鈺成做咗直選特首，葉國謙做泛建制議會黨團召集人，佢隨時惡過曾鈺成，因為一旦反對派拉布拒絕審議撥款，便要展開朝野黨團協商，執政黨團作出讓步，可能將原本政府提出政策作出重大修訂。所以，政黨政治唔係萬能，只不過提供一條合理出路。
屆時沿自殖民地時代嘅行政主導要改變，政黨中人問政態度亦要改變，大家一齊摸住石頭過河，期間一定會出現大大小小政爭角力，咁樣港人治港先至有一條learning curve，慢慢進步。
𠵱家根本係靠屈機，用唔公平唔民主制度確保行政主導，但香港社會已經產生巨變，唔再係30年前。
一個殘缺不全嘅政治體制，完全解決唔到矛盾，政治鬥爭向社會層面蔓延，人人受害！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange