本周可以話係港股安全期，因為冇乜潛在壞消息。晉佳估計，短線個股癲多幾日，然後月中可能驚吓聯儲局退市，炒友中間或者要休息幾日，但議息後個股又會繼續衝過。傳統指數成份股喺呢個月嘅表現會差少少，投資者可以集中火力進擊二、三線股同細價股。
即使晉佳估計投資者下星期開始驚退市，到時市況以至個股都偏向波動，但相信強勢股只係借機chok吓，有波幅冇跌幅，手持好股就唔好輕易被震走。至於純粹短炒，賬面贏梗錢嘅，如果下星期見到有調整迹象，就可能要睇位食吓糊。
科網業旺 盈利望續增
個市好，策略自然越簡單越好，喺呢個好炒嘅12月至明年1月，揀股唔怕大路，最緊要有得賺，唔需要勉強搵滄海遺珠嚟攞難度分。
上期晉佳講到買濠賭股抵博過中資股之後，濠賭股啱啱幾日表現相當唔錯，大大細細都炒上，至於通常一齊炒埋嘅二、三線科網股，噚日都起動。
「久沉」咗超過一個月嘅金山軟件（3888），噚日先嚟第一棍陽燭，咁大成交嘅強勢股唔使同你玩震倉儲貨咁多蠱惑嘢，股價轉強照計冇乜假動作，牌面更加追得過。
金山呢隻大路到咁嘅股份，真係懶得解釋咁多財務分析，只要當佢係一隻增長股就得。金山嘅賣點，係小米嘅雷軍嚟揸旗，市場覺得佢有能力令金山變強，同埋科網行業近年已經搵到收錢嘅方程式，只要執行能力唔太差，盈利就可以保持增長可測性。雖然金山本身執行能力一般，雷軍一條友未必短時間內改變到成間公司，但公司順住科網行業大旺嘅趨勢，要盈利keep住增長，難度確實唔大。
回想起晉佳一年前推介過金山，當時股價5元都未有，點會諗到一年後佢會上到20元呢啲位。
根據彭博資料，券商平均預測金山嘅今年市盈率28倍左右，而預測增長幅度就當兩成至三成，市盈增長率（PEG）大約一倍，估值仍合理。
君不見香港上市嘅增長股PEG已經大部份都高過一倍？騰訊（700）、翠華（1314）等等都係兩三成盈利增長，就可以分別負擔起39同36倍嘅預測今年度市盈率，照咁睇，金山估值就有優勢。就以騰訊估值折讓兩成計，可以升到31倍市盈率，短線目標價可以睇22元。如果騰訊同步上升，金山股價就有條件升得更高。
睇圖表，金山10月尾到𠵱家，大部份時間喺19元附近上落，噚日第一棍向上突破後，預期喺市場風險胃納高企嘅12月，月尾股價好大機會高過現價，22元只係初步目標，月底至明年1月，可以博破頂上到24元，跌破18.5元止蝕。
晉佳
本欄逢周三刊登
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24