人紅自然多獎拎；話皇家馬德里翼鋒基斯坦奴朗拿度（C朗）喺西甲最紅，相信都冇咩人反對，雖然頒獎禮重要性唔及金球獎，但周一佢都連走兩轉，先喺晏晝以便服look出席《馬卡報》上季頒獎禮，夜晚就西裝look出席西足總搞嘅頒獎禮，走兩轉就拎兩個大獎。
C朗衣着一向就俾人話冇咩品味，仲有陣陣土豪味㖭；夜晚個12/13球季頒獎禮由西足總搞，C朗諗住隆重啲，但黑色西裝襯條卡其色西褲真係有啲怪，好在佢冇帶佢條巨型名牌皮帶咋，唔係土味仲濃。不過點都好，佢人氣咁勁，最有價值球員獎唔係佢仲有邊個。
美斯缺席擸兩個最佳
至於C朗死敵美斯，就拎到最佳球員同最佳前鋒兩個大獎，不過美斯因為留喺阿根廷養傷，獎就由巴塞會長羅素代領。據報美斯周一已經喺阿根廷國家隊嘅訓練基地展開復康工作，慢跑吓練吓射門，晏晝仲做埋gym，喺呢個輕鬆環境，美斯應該可以好好準備復出。同樣有兩個獎落袋嘅仲有今季由皇蘇轉投皇馬嘅新星伊拿拉文迪，佢就拎到最佳防守中場同最佳新人。
西班牙人唔知點解咁鍾意同日搞咁多頒獎禮，《馬卡報》周一下晝又搞頒獎禮，C朗又拎到代表最佳球員嘅迪史堤芬奴獎。其他獎項方面，最特別就係最有體育精神獎，由一個叫阿歷辛祖（Alejandro）嘅6歲小朋友拎到，原來佢參加一個U8足球賽，見教練同球證有爭執，就充當和事老勸交，年紀輕輕就咁英勇，抵佢有獎拎，仲可以同偶像C朗合照。
足本收睇《亂噏24》x謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24