阿信屋母公司CEC國際（759）近期變咗炒家樂園，日日成交都講緊億億聲，以其市值約廿幾億計，絕對稱得上誇張，最可怕嘅係上落波幅之大，係近年當炒股中少見，好似噚日咁，單日波幅超過兩成。從好嗰方面睇，證明市場游資充裕，只待破位一刻轉攻大藍籌。
大市高位整固，今日主力update兩隻近期推介過嘅股份。先講已放榜嘅四洲集團（374），業績不負眾望，截至9月底止中期盈利7,112萬銀，按年增長63.5%，收入微增4%至14.3億銀，但銷售成本反跌近2%，令毛利率急升近4個百分點至32.7%，主要受惠日圓下跌。作為日本雪印奶粉代理，集團本月起進軍內地市場，並以廣東省作起點，連灸手可熱嘅奶粉市場都撈理，概念夠晒sexy！噚日逆市再升7.8%，但年度化市盈率僅12倍，肯定有餘未盡。
至於上周推介嘅創維（751），日線圖已行至三角形末端，一旦突破上周高位4.78元，新升浪便會展開，不厭其煩講多次，預測市盈率7.3倍，較同業海爾電器（1169）大大折讓六成，仲有五厘息墊底，港股升到兩年幾新高，竟然仲有如此超值股。聖誕新春假期乃傳統電視銷售旺季，話唔定就係破位嘅催化劑，戰友們有買要趁手。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange