新一年將至，唔少人都會求神問卜，睇吓來年點樣趨吉避凶；今年醜聞纏身、是非多多嘅發展局陳局長謬波，似乎都要洗走衰氣，但佢唔係求助黃大仙或者向蔡伯勵大師求救，反而問道於政壇高人，希望指點迷津。八方聽聞，佢最近求教政壇高人，劈頭就想知，餘下任期點做先至好？
發生完劏房風波、之後又有囤地醜聞，謬波依然留低唔肯辭職，呢份勇氣同毅力，真係非常人所能及。據知佢不但全無去意，更加想喺餘下任期做好佢份工；但負面新聞一大堆喎，點樣再上路，確實係高難度，所以聽聞佢近期四出搵政界中人食飯，聽吓大家有乜嘢高見。
八方聽聞，其中一個獲謬波「求教」嘅就係諗頭多多嘅金勞詹。據講謬波問金勞詹，日後何去何從好？事關佢有好多嘢想推行，但喺咁嘅政治困境下，似乎都好難有作為，席間仲好似有啲難言之隱同感觸咁喎。
金勞詹：點解唔賣甩塊地？
八方記得董伯伯講過，留低比離開需有更大勇氣。既然謬波咁「沙卜」，又虛心求教，據聞金勞詹都慷慨提點佢，叫佢做唔到都好，都要試下推政策，例如新界東北計劃，咪連埋粉嶺高球場一齊發展囉。
據聞金勞詹當場仲責難過謬波，做乜新界東北幅地要賣畀自己人唔肯賣甩？聽聞謬波苦笑話，幅地得嗰兩萬幾呎咁細，唔賣畀自己人又邊有人吼？信不信由大家了。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange