一田同崇光百貨半年一度嘅感謝祭，唔少貨品割價傾銷兼送大量禮物，可以話係城中師奶、OL搶購平貨嘅重要日子，但原來呢兩段時間都係入境處邊境管制站嘅大日子。
有駐守邊境管制站嘅入境處阿Sir同八方講，自從深圳居民可以一簽多行後，對邊境管制站嚟講，日日都係黃金周，如果收到風，知道香港百貨公司好似一田、崇光搞周年大減價，自由行都會一窩蜂嚟掃貨，尤其周六同周日，多個邊管制站實俾呢批自由行塞爆，入境處要抽調人手應付。
所謂知己知彼，近年入境處人員都要上網收集邊間百貨公司有周年大減價、工展會、美食節，甚至紅酒展等情報，以便部署人手應付過關旅客，好似嚟緊嘅工展會，入境處就要由總部抽調人手去邊境幫拖。提起崇光，有零售業二五講，銅鑼灣崇光喺啱啱舉行嘅感謝祭，第一日生意額就達一億，八方相信自由行貢獻唔少。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange