唔好話Prof J「馬後炮」，三太隻澳門勵駿（1680），簡直同我偶像Eason隻歌一樣——無人之境，即係飛到你同我都唔知去咗邊，點睇，放風箏囉，一路跟住先啦！
內房股打高檔牌
今日同大家講吓隻新股，叫做時代地產（1233），佢個名的確係夠氣勢，代號又抽越秀（123）水，確係好波！
時代地產喺廣東省具有市場領導地位，大家都知廣州係全國人口最密、經濟最繁榮嘅地區之一，時代地產靠住廣州個「朵」，輻射去佛山、珠海、中山同清遠等廣東省各地。時代以成長、成熟同成功為題嘅「三成策略」，針對唔同客戶，目標客戶鎖定正確！
時代係地產界嘅「生活藝術家」，一聽個名就知sell高貴啦。去到2013年9月，時代已經簽約銷售咗總共56.7億元（人仔．下同）。
好似啱啱喺珠海賣嘅時代港項目，兩個鐘頭賣咗400幾個單位，廣州一樣好嘢，兩個鐘賣咗378個單位，確係無得頂！以土地儲備計，時代擁有超過840萬平方米，計落夠未來五年慢慢用。
喺內地，土地儲備主要由政府組織「招、拍、掛」，收購持有工地使用權同「三舊改造」政策徵用土地。
時代係以「三舊改造」優勢為最明顯，例如時代花生項目，位於白雲區，成本價6,400元平方米，隔離「招、拍、掛」嘅項目，出價講緊15,000元，極度靚仔，留意多兩眼！
另外，Prof J仲建議盈信控股（015），佢主要係做公營機構生意，以老牌建築股、大折讓見稱，同另一隻茂盛控股（022）有異曲同工之妙，一個咁好彩俾人睇中，應該犀利到不得了！繼續追蹤，出發！
徐燦傑
中國銀河國際財富管理主管
本欄逢周三刊出
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24