話說當年，韋達曾經夥拍「雄心威龍」攻下女皇盃，翌年人馬亦贏埋三冠大賽頭兩關董事盃同埋香港金盃，之後仲去遠征杜拜。不過自韋達喺冠軍一哩賽騎「雄心威龍」跑第四後，佢就同苗禮德成年半都冇合作啦！當日賽後，苗禮德公開向傳媒力數韋達唔跟策騎指示，明明叫咗韋達唔好喺直路走入內欄，佢就偏偏入內欄，同埋賽前仲成日操住呢場嘅主要對手蔡廐「精彩日子」，咁樣根本係對雄心威龍嘅馬主唔尊重。而韋達就解釋，將匹馬走入內欄係因為形勢所迫，至於今次輸，只係因為匹馬唔夠狀態，自此韋達同苗禮德就連其他馬都冇再合作啦！今晚賽事，呢對組合突然合作番，皆因今次騎師賽啲馬係抽籤配騎師，而唔係練馬師揀騎師。韋達喺第七場就會騎苗禮德馬房嘅「風雷」，呢匹馬上場贏得好輕鬆，今次升班兼轉場，都唔係冇機會。不過騎師同練馬師有過咁深嘅芥蒂，到時會點？真係冇人知。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange