雖然香港女仔被標籤「港女」，又成日俾人狠批惡死，唔似得台灣美眉或者日本妹咁嬌嗲，不過鹹魚青菜各有所愛，野蠻女友都一樣有人鍾意嘅。好似多蒙特前鋒羅拔利雲度夫斯基，就唔似得其他球星情迷性感𡃁模，反而獨愛打女！
25歲嘅羅拔仔唔單止出身於運動世家，爸爸係柔道冠軍，媽媽同細妹係職業排球員，連老婆安娜都係空手道高手。安娜周日喺布拉格世錦賽贏得空手道冠軍，羅拔仔急不及待喺facebook上載安娜同團員嘅合照（圖），旁邊寫上「金牌」，仲加上3個微笑圖案，仲開心過自己「士哥」。
一對小情人喺2007年因為一個向學生宣揚運動嘅活動上認識，自此就拍拖到今年6月正式結婚。「羅拔嫂」私底下man唔man就唔知，不過羅拔仔話第一眼見到安娜時，憑其運動型身材，以為佢一係就跳芭蕾，一係就玩網球，誓估唔到原來佢係空手道高手。安娜外表嬌柔，笑容又咁sweet，同場上殺氣騰騰判若兩人，睇得又打得，可能就係呢種反差，吸引到羅拔仔自投戀愛墳墓！
文：呂晨
以女性角度看球星新聞，唔用眉筆用原子筆寫低球壇百態！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange