北京開始為政改談判向泛民探路。有曾與內地中間人接觸的泛民中人笑言，北京對是否讓泛民入閘仍「十五十六」，因北京心知肚明，若拋出一個擺明封殺泛民方案，不只泛民「反枱」，連一些溫和建制派及商界也無法接受；但若要泛民「入閘」，北京又要這個方案保證泛民一定無法當選！
想泛民做「參選人」非「候選人」
該泛民中人對季陶笑言，其實北京在今次政改爭議中，面對的困難不下於泛民：企硬阻泛民入閘固然好，但由北京自行摧毀2017普選特首承諾，難免遭英、美政府大做文章，亦會引起香港內部溫和力量不滿，對國家主席習近平來說更是一次對港政策的挫敗，所以對阿爺來說，政改通過始終較不通過好。
阿爺想政改通過，但又不想泛民有任何機會當選；該泛民中人指阿爺心目中「理想方案」是泛民可以入閘、但永遠不會在普選中勝出；又或泛民可以做「參選人」，但不可以做「候選人」。但問題是泛民可以入閘卻永不會當選根本不切實際；讓泛民只可做「參選人」，香港人亦不會「收貨」，所以阿爺「理想方案」只是緣木求魚，永不可能出現。
事實上政改可否通過，現只在習近平一念之間，該泛民中人直言，「只要習有信心，唔怕泛民當選特首，咁所有問題其實都唔係問題；如果佢企硬一定保證唔畀泛民當選，咁就乜嘢都唔使傾」。
季陶
足本收睇《亂噏24》謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24