內地重啟IPO終於成事，部份企業最快於明年1月陸續上市，港股竟然只係朝早震一震落嚟，之後就升番上去，又企番喺二萬四收市，強勢仍未終止。不過，細心一睇，主要大藍籌匯控（005）、中移動（941）、內銀股都無乜點郁，只係騰訊（700）、內險股推高大市。
而部份細價股就炒到飛起，當中升得最癲的中國長遠（110）炒高逾89%，升至0.54元。原來有報道推測，該公司可能同超人李嘉誠早前接受內地媒體專訪時講過的新電話操作系統出現有關！
留意周期性股份
雖然公司發通告話不知股價飆升原因，但炒友一樣照衝，以近全日高位收市。不過，有散戶就話，炒超人合作的消息，成交都只得2,900幾萬元，似乎又少咗啲，都係小心為妙。
近日周期性股份都有起色，好似航運、煤炭股。瑞信噚日發報告指，維持恒鼎實業（1393）中性評級，目標價1.3元。主要原因是恒鼎出售非核心鋰礦業務，將錄得約1億元人民幣一次性收益，可加強現金流，不過相信恒鼎2013年度仲會繼續蝕錢。
睇番個圖，恒鼎年初見2.6元左右，之後就好似滑梯咁跌落嚟。雖然過去數月已經維持整固格局，昨收1.32元，預料股價再大跌的機會不大，但公司經營疲弱，實在不宜入市博反彈。
瑪姬兒建議留意兗煤（1171），此股上月一度大成交配合突破橫行區，現時有待正面催化劑，有望再現升勢。
瑪姬兒
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24