金融界噚日舉行佔中小組討論，有近20人出席，參加者之中，除咗美資公司IT從業員，仲有基金公司經理，而喺一眾年輕金融才俊之中，原本有一位特別人物應承咗會嚟，佢就係「幫港出聲」發起人周融嘅前舅仔Justin。金融界嘅前親戚同周融打對台？都幾有睇頭喎。
63歲嘅周融經歷四段婚姻，從事基金工作嘅Justin，正係佢前妻嘅細佬，不過據知佢哋好少見面。一來過氣姊夫早已另娶國泰女高層，加上Justin長居新加坡工作，真係幾年都未必會見一次。不過八方等到夜晚9點，佢因公務繁忙，最後no show，想聽佢心聲要等下次。
前共青團俾港人感動
除咗Justin，仲有細個喺內地做過共青團嘅葛志紅，七年前為照顧媽媽來港定居嘅佢，直言受港人爭取民主同普選嘅熱情感動，認為有必要了解多啲，所以幾次金融界嘅討論，佢從不缺席。
負責統籌金融界討論嘅資深對沖基金經理錢志健就話，身為中環人，絕不能置身事外，佢仲透露上次商討日後，遇黑客狙擊，一日發兩萬個電郵，向佢進行網絡轟炸，不過佢就話唔會俾呢啲小動作嚇親咁話。八方聽聞，有金融界人士近年都覺得制度唔公義嘅問題嚴重，加上越來越多高官子女滲透喺香港各界位居要職，再咁落去，公平社會、獅子山下精神分分鐘不復再，所以今次和平佔中爭普選，冇可能唔撐咁話。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange