思捷（330）CEO馬浩思曾經係Zara母公司Inditex高層，市場一早預佢會循Zara路線改革思捷。佢接受路透社訪問坦言，思捷要轉型成功，首先要改善設計，令人覺得抵買，仲要縮短新衫上架時間，即係要平靚快。呢個做法同Zara好相似啫。
明年試推平價品牌
快速時裝近年大行其道，跟住呢條路改革都無可厚非，馬浩思接任思捷CEO一年多，至少請來5位跟佢一齊喺舊舖出身嘅管理層，一齊打拼咁話。馬浩思認為，市場對思捷嘅變化，反應正面，未來佢計劃增加投資貨倉，再縮短產品上架時間。
此外，彭博引述佢所講，思捷計劃明年上半年推出一個既年輕又較平嘅新品牌，先喺德國、奧地利、比利時、荷蘭同盧森堡試水溫，並重申思捷明年可能扭虧為盈。股東望係咁望啦。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange