自從幾年前D&G事件，北大毛左孔慶東教授大罵港人奴性後，香港與內地矛盾加劇，自由行overload，內地遊客不文明行為、到雙非爭資源、爭奶粉，兩地出現了緊張關係，九龍城出現疑似內地拐子佬，內地網民即時反應係今次又被港人臭罵。
愚民式政治教育肇禍
中策組顧問邵善波接受內地黨媒訪問，指港人因經濟優勢不再，於是便自我陶醉，突出香港民主自由、文明進步，求取自我平衡。可能有部份港人面對內地崛起有此心態亦唔出奇，但當黨媒指責港人歧視內地人時，有否反省今日中國大陸，以乜嘢形象出現在世界舞台，而對內地人不滿者，又豈止是香港人。台灣、泰國、新加坡、溫哥華，凡我接觸過之當地人，大多對內地人冇好感，唔通新加坡、加拿大人又自我陶醉，心理唔平衡？
有次我在曼谷翟道翟市集坐低飲咖啡，同一個當地做兼職嘅大學生傾偈，提起內地遊客，佢皺起眉頭，擰擰頭問我，點解佢哋咁嘈吵，在BTS講嘢全個車廂人人聽到。泰國人講嘢陰聲細氣，自然對強國遊客反感。
當然，全世界都要同大陸做生意賺人仔，但做生意唔代表要做朋友，人仔可以買到關係，但買唔到朋友。內地人不禮貌、唔守規矩、搶哄，已成為stereotype，好難再搣得甩。要怪，就只能怪改革開放前30年，全盤否定禮儀廉恥、孝悌忠信等傳統核心價值，取而代之，係一種愚民式政治教育，全國只有三種顏色的衣着，文革十年只上演幾台革命芭蕾舞蹈劇，知青上山下鄉，被革命理想所愚弄。有幾多人嘅青春一去不回，到今日內地50歲的一代，年輕時鬧革命，冇受過乜嘢教育，受過愚弄後又唔再去相信乜嘢價值理想，眼中只有實際利益，唔信任有公正制度，搶到手先係真嘅。試問呢種國民特質，點會得到其他人的尊重。
香港人突出自己制度及文明優越性，目的唔係阿Q式精神勝利法，而係擔心兩地融合，內地一制強，人又多，會吞噬香港，令香港變成內地城市。曾幾何時，內地視香港為經濟現代化楷模，以學習香港為榮。今日強國崛起，但社會制度不公，價值信念扭曲，有羞恥心者，應自我反省，學習香港在經濟以外，其他文明進步一面。若果只一味指摘港人歧視，諉過於人，自我陶醉於大國崛起、萬邦來朝之天朝大夢，實在有負鄧小平當日設計一國兩制嘅用心。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange