張學友噚日同曾志偉喺尖沙嘴公佈梅艷芳音樂會詳情，學友謂：「過去10年好似差少少嘢，有種感覺唔知點解要做，只知好想做好想做。」就係呢份感覺令學友發起本月30日晚舉辦「梅艷芳．10．思念．音樂會」，學友指阿梅係「香港女兒」，對壇樂貢獻係毋庸置疑：「阿梅走咗10年，12月30日，我自己覺得至少演藝界朋友要正式向阿梅表示敬意同尊重，希望透過媒體令當晚每個人都諗起梅艷芳，成為梅艷芳之夜。」
指定着黑白衫
學友原先想同幾個朋友夾錢做騷，開會後覺得要畀公眾參與先賣飛，學友話：「我做生意未賺過錢，今次應該唔例外，唔夠錢我哋會補貼，有多就捐畀阿梅支持團體。」當晚會畀各媒體作一次性轉播，事後唔會出販賣產品。原定計劃有展覽會，但礙於場地問題取消，佢哋亦有聯絡梅媽覃美金同邀請佢嚟睇，嘉賓全由學友親自挑選同邀請，學友話：「希望大家親自上台講，所以唔會有錄像片段。」門票噚日發售，但中午時因座位調動而暫停賣飛，今朝十點重賣，而賣出門票不受影響。當晚入場觀眾要着黑白色衫，若果不符會被拒入場。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！