英國「跳水王子」戴利，日前喺YouTube個人專頁，上載短片同佢啲粉絲宣佈：「我係雙性戀！」佢仲話自己𠵱家同一個男人蜜運中，媽媽好支持佢嘅決定，而自己公開性取向目的係唔想畀人扭曲事實，真係好有勇氣！
講男友：佢畀到我安全感
現年19歲嘅戴利，自從上年倫奧奪得10米台銅牌，同今年因傷喺世界游泳錦標賽跳水項目爭唔到牌之後，就冇乜聲氣。不過，日前佢忽然喺自己個YouTube專頁同球迷「深情對話」，咁19歲男仔有咩好講？咪又係啲情情愛愛嘢。戴利口窒窒咁開口，話自己最近遇到個人，仲行得好埋。原本都冇乜特別，但點知後嚟佢對住鏡頭講：「呢個人係個男人，我都覺得幾驚訝。」
戴利繼續講：「我成日都諗呢啲嘢（雙性戀）有可能會發生，但係到咗今年春天我遇到佢，所有嘢都變得好好。我覺得咁都ok呀，今次仲改變咗我嘅世界。」女粉絲聽到可能會肝腸寸斷，不過又唔使咁快絕望住，因為戴利仔之後又話：「不過我仲係對女仔有feel，只係𠵱家我同個男人一齊，仲開心到不得了。佢俾到我安全感。」
強調對女性仍有feel
戴利仲話兩年前過身嘅戴利爸，都會為佢高興，而家人方面就有唔同反應。「媽媽好支持我，我亦可以話畀你知，我朋友同家人對（雙性戀）件事都好正面。」不過，佢話有部份人叫佢唔好出聲：「佢哋問我點解要自己走出嚟講，點解唔用發聲明、做雜誌、電視台訪問呢啲方式公開。我只係唔想我講嘅嘢會畀人扭曲。我想終止一切關於我性取向嘅謠言，我想同你哋（粉絲）講，你哋會明白，因為我想咁做。」
點解戴利要公開自己係雙性戀，冇人知。但係之前佢同美國跳水女選手曲克，同英國跳水隊女隊友都傳出過緋聞，今次同同性拍拖，話唔埋畀舊愛hurt得多，反而喺男人身上搵到安慰都未定。其實近年唔少運動員都「出櫃」（見附表），不過公開話自己雙性戀，就真係唔多。
足本收睇《亂噏24》謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24