中港股市可謂冰火兩重天，中證監連環推出四招，為內地股市升呢鋪路，不過股民明顯唔領情，原先瘋炒嘅創業板指數，被一盤冷水照頭淋，單日重挫8%。呢邊廂港股就炒到甩轆，恒指企穩24000大關之餘，二三線股強勢畢呈，廿大升幅榜中，全部都有一成過外升幅，睇嚟大市年尾例升神話可以延續。
最近唐牛愛上食翠華（1314），雖然價錢比起普通茶餐廳貴一截，但食物有一定水準，尤其喺細節上如辣椒油都做得相當出色，睇得出係有心機。最新半年盈利增長32%，但其實翠華亮點在於內地市場，中期收益勁升近倍，但其店舖數目只有9間，大把發圍空間，加上有9億元現金在手，要擴充絕對不成問題，但做其股東一定要有耐性，絕不適合短炒客。
另一方面，噚日提過嘅鳳凰醫療（1515）再升15%，反映新股市場動力十足。時尚環球（8309）今日喺創業板上市，屬全配售股份，集團主要設計及產銷女士服裝，最新自有品牌收入佔比約12%，未來可望增至三成，由於自有品牌毛利率高達40%，賺錢能力值得看高一線。是次集資額3,450萬銀，加上全配售關係，細細粒容易炒起，如高開不多，可考慮短炒一轉。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange