喺上個禮拜對加拉塔沙雷嘅歐聯，皇馬後衞沙治奧拉莫斯又領紅，創下球會紀錄嘅第17面紅牌。好多人都唔覺得出奇，因身為後衞嘅拉莫斯一向輕出兼火爆，成日攞牌。不過，拉莫斯咁躁原來係另有內情，事緣佢嘅明星女友比娜有一輯不雅艷照，俾前男友擺咗上網「公諸同好」囉！
沙治奧拉莫斯初成名時，真係唔多鍾意佢，馬面加埋長直髮，好聽就話似德國歌手Gil，唔好聽就根本係似美國科幻電視劇嘅主角ALF；加上佢踢後衞又確係屎，就因為咁，所以先練得佢隊友門將卡斯拿斯一身好武功。不過，拉莫斯近年的確進步咗，加上剪短頭髮後，成個人都醒神晒；而喺上個月公佈大佢11年嘅明星女友比娜有喜之後，拉莫斯就更加成熟。
點知好衰唔衰，比娜前男友將佢嘅不雅艷照放上網，搞到拉莫斯好唔老利，所以咪喺對加拉塔沙雷場波出事囉。比娜見咁落去唔係辦法，喺日前就孖住拉莫斯一齊去報警，等警方擺平件事。比娜咁識做，抵拉莫斯喺電視節目中為佢唱情歌！文：吾中
足本收睇《亂噏24》謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24