成班人坐埋一齊，有教授、專欄作家、評論員及老闆，傾香港人口問題，人人意見不同，但好快就聚焦於輸入人才，輸入醫生護士，認為目前香港醫護人手嚴重不足，適逢人口迅速老化，老年病患者不斷增加，但本港私家醫院與公立醫院已經日日「全院滿座」，病牀難求，老人家病了，怎麼辦？大教授話：「我正在考慮幾時移民，移民並非為甚麼大條理由，而係為咗自己十年八年後病咗可以入到醫院有人醫咁簡單啫。」
照計大教授已係人上人，太太又係醫生，但仍然咁驚他日香港嚴重短缺病牀及醫生，顯然係佢做過一番調查研究之故。講到人口政策，有兩個議題係「假」嘅，不值得浪費時間討論，第一係設人口上限，鬼知道香港應該有幾多人咩，譬如胡亂噏個數字八百萬，如果真係過咗嘅話，有甚麼方法強制減人口，將多餘超額香港居民驅逐出境呀？呢樣嘢主要由市場意願決定，非政府可以控制。第二個係每日150名單程證入境名額，此乃家庭團聚問題，不少香港男人跨境娶老婆（本港婚姻之中，據政府官員講，有35%係跨境婚姻），基於人權問題，不能拒絕佢地嘅太太及兒女來港。
每日150人，來的比較多是基層低技術人士，少數係有錢內地客，故此本港貧富差距每天都在擴闊。為了抵銷此類人士之負面（經濟方面）影響及為香港增強人才競爭力，大家贊成輸入人才，在每日150人單程證限額後，特區政府不如加設每日多三、五十名人才配額，仿效新加坡，以生產力高、技術高、學歷高人士為主，來源地不限，以新加坡經驗，呢類移民可以對本地GDP增長有貢獻。選人可用評分制，譬如學以前加拿大，醫生可得滿分。講到呢度，政府一定會腳軟，但為了絕大部份香港人之健康福利，特區政府豈能不以大多數人意願為依歸，竟然向少數既得利益人士投降呀？香港目前人口結構之中，已發生嘅問題係勞工不足，關鍵性人才不足，必須輸入；即將發生嘅問題係人口老化，將來退休咗嘅大學生之絕對數字仲高過在職就業大學生。有人提出津貼生育，據富裕歐洲國家經驗，生育津貼難以提高生育率，只係浪費納稅人金錢嘅唧！