兩個禮拜前，細價股金寶通（320）發盈警，一發完就升咗差唔多八成，不過市值仲係冇6億。佢手持嘅現金加可以變賣、收錢嘅嘢，都有成9億幾淨資產，加埋個殼，應該都值差唔多13億。
金寶通同兩個禮拜前我叫「不問價追」嘅中慧國際（1143），都有神級資產負債表，亦唔係上個禮拜先知，所以大家會問點解股價橫行成年，𠵱家仲要發埋盈警先升？噚日我打畀個老炒家就搵到答案。
呢間早喺1976年已經攞香港中華廠商會頒產品獎嘅老牌本地企業，喺2006年上市。今年已經81歲嘅主席，喺上市時搵咗自己個喺聖保羅男女、哈佛畢業嘅仔做行政總裁，點知業務一路冇起色。個仔先走咗去，之後連高層最後位後生都喺年多前走埋，公司完全後繼無人。
備拆骨賣殼條件
業務拉鋸，雖然營業額勁，不過毛利低，兩周前宣佈因有客走數，一變就轉盈為虧，上周公佈業績蝕兩千萬。
公司其實萬事俱備被拆骨賣殼，不過欠東風。老炒家話，上周轉盈為虧就係東風。睇資產負債表同盈警，股價咁升，應該有春江鴨，會似米蘭站（1150）賣盤。
講到呢度，我又周顯兄上身。更重要原因：呢位老炒家朋友，身家多就無，十幾億左右，都係炒股賺嘅。三周前同佢講中慧，噚日講金寶通，佢話原來海嘯前喺1.1元大量入貨，即係遠高過噚日收市0.71元。佢仲話「揸到停牌」，即等公司停牌賣盤通告出先賣，佢話可能係個半、兩蚊。
我即刻諗，（一）你都肯買，肯定有料到。（二）蟹貨喺1.1元，𠵱家升一倍升到1.42元，佢都唔沽啦！要買到倍升股，繼CEC（759）、中慧之後就係呢隻，所以孫柏文建議不問價追金寶通！
最後提大家，上次跟足「不問價追中慧」，毋懼建議裂口高開三成四，喺開市價0.97元買入，到噚日賺25%。我唔答啲兩日後更高位先追貨，問我點睇嘅人！
孫柏文
獨立股評人
http://facebook.com/shuen
本欄逢周二刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange