菲菲買嘢多數都係衝動性消費，行街見實物，拎上手，靚就買。相反，網購時得張相，一來冇實物睇，中伏機會大；二來等貨送到快都要幾日，到時可能已興致盡失。
雖則菲菲老土唔多buy呢套，但係網購的確越做越大，而家上網乜都有得賣。國美電器（493）最近亦宣佈推出藝術品B2C網購平台「國之美」，要同內地過千間藝術品電商一決高下。雖然目前只屬起步階段，但以國美品牌，預料可以增加消費者對藝術品真偽嘅信心。
網購盛行，平台、速遞業務自然有着數，但日本最大網上支付系統供應商環亞智富（1390）將周五招股，就提醒大家支付平台行業，近年亦食正網上支付條財路。
事實上，支付系統相關股中國創新支付（8083）噚日亦大升一成。公司過去一直經營預付卡業務，但公司一早睇好網絡支付市場，旗下高匯通與騰訊（700）合作推出之「高匯通微樂付卡」已於最近幾個月推出。呢張卡係全中國，第一張可以將實體卡，結合手機QR code虛擬支付嘅預付卡；更重要係可以結合微信戶口去畀錢。呢種咁創新嘅支付模式，做唔做得起雖仍屬未知之數，但至少可以肯定，公司可以受惠微信此強大平台，加快轉型成為網上支付新平台。
Fifi
本欄逢周二、四刊出
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24