來到尾站，高潮所在，終能親眼見證摩連奴再領的車仔，在英超球壇的霸氣，拜服！
由韋斯咸的烏普頓公園球場，相隔一天再到車仔的史丹福橋，看藍軍周日在前列大戰迎守力最強的修咸頓；感受到首都同一天空下，不論球迷、比賽風格以至領隊功力，由平民版極速升呢到極級版，極過癮。像一家三口來自香港、包括利記躉父親Ernest同最愛已離隊杜奧巴的Michael；為了一睹兒子Michael偶像球隊的風采，父母幫襯Thomas Cook豪買3張比票面貴逾兩倍、各值逾200鎊的門票，波飛到手才制訂行程；不過Michael賽前指不太看好車仔今屆奪標，訪問了他十多分鐘後球證鳴笛開波，看來這位香港車迷的悲觀不無道理。
現場睇3核好興奮
霸氣，就是要你沒法想像！在港成日恨睇車仔3核10+11+17號同場，但這陣容在講實際的摩帥部署中本不易見；睇波尾站棄熱刺睇車仔，不容有失狠花連入會費近百鎊，坐正中間居高臨下的靚位，失望是想睇多次林柏特，卻用了摩帥「契仔」艾辛先打防中，興奮是正選有齊奧斯卡杜斯山度士、夏薩特及桑馬達。
今次筆者英國之旅極旺主隊（總計入場的，6勝1負），也旺閃電入球（曼城捷西斯拿華斯13秒、阿仙奴韋舒亞30秒及今次修咸頓積洛迪古斯13秒）所以準會提早入座，但未定神睇清楚3核如何配搭，客軍已靠艾辛出錯開紀錄。在這豪宅密佈的倫敦西南部名氣隊場內，坐在筆者旁的，不再是槌仔幫的慢熱麻甩；卻不乏身光頸靚，連球會波衫及頸巾通通不戴的高傲一族。藍軍迅速落後，中間看台的球迷，鮮與身旁鄰座傾波經，卻不斷喃喃自語不滿車仔表現，以及向球證每個不利主隊的判決喝倒采；筆者在他們身旁，感受到是一股唔輸得、顧客（買飛入場的車迷）永遠是對的霸氣。
車仔今屆不斷犯錯，卻不斷能從錯誤學習，可怕正是在此，艾辛上半場被對手的舒尼達連比下去，截擊力大降；3核在居高臨下看，各有腳法大玩地面進攻但發揮不出水準。摩帥囂得起就是能先藉奧斯卡傷出，換入林伯穩住中場，下半場再用丹巴巴亞打回4-4-2，棄艾辛即扭轉敗局；入到第3球，摩佬興奮得走上觀眾席與兒子擁抱。不少賽後評論認為摩帥上半場排錯陣，其實反正主場向來無敵，不斷試陣也未被阿仙奴放甩；只是當地車迷，每次付出高昂門票睇極為緊湊的英超，總有極高期望，他們的霸氣就是要完美，摩帥就是要逐步將這霸氣推向高峯。頂級賽事能睇到反勝不常見，站在欣賞角度，我這類「過客」一定高呼抵睇，圓滿！
10日睇7場波過足癮
執筆至此，筆者10天內由英國北至南去過8個球場，睇了4項賽事7場波的「任我行」也要作結；多謝讀友連日捧場，多謝兩位在英國的表弟Daniel及Gabriel令我有瓦遮頭有啖好食；克服重重難關，原來神仙魚橫渡大海「不會」斷魂，回港後更有力量為人生下半場打拼，或許明年5月再重臨朝聖，睇阿仙奴……文：蘋果波神
足本收睇《亂噏24》謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24