港股上周縱未能企穩24000關，但已創出今年新高，可喜可賀。雖說基金年尾多收爐，但恒指近五年例牌上升，粉飾櫥窗效應依然不可小覷，預期喺成交相對較小嘅情況下，後市更容易挾高。
另一方面，新股市場依然㷫烚烚，上周五掛牌嘅鳳凰醫療（1515），單日炒高36%，晉身今年新股升幅榜第二位，根據探子回報，基金求貨若渴，搶貨搶到手軟，難怪喺散戶中籤率奇高下，依然可以升到啪啪聲，後市值得看高一線。嚟緊嘅新股焦點中國信達（1359），市傳部份證券行孖展已經爆到七彩，新股旺場，亦為後市注入強心針。
個股方面，上周五傳出內地交通運輸部，正積極推進海運業發展提升至國家戰略層面，方案並已提交國務院。消息傳出後，航運及造船股即時起錨，今年屢創新高嘅廣船（317）再破頂，如想追落後嘅話，不妨考慮價殘股熔盛重工（1101）。
熔盛乃內地最大民營造船企業，不過，受業績不濟困擾，股價低沉，但行業好消息頻傳，除中央推進海運業外，早前工信部亦發佈《船舶行業規範條件》，可以用四個字總結︰汰弱留強！熔盛食正條水，上周五破旗而上，反彈浪一觸即發，現價PB 0.46倍，五折有找，一旦獲資金相中，隨時升到你唔信。
唐牛
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24