我知道的，敵人的敵人應該是朋友，有時甚至應該同仇敵愾，但陳總話齋，有些事，「真的假不了」喎。
誠哥上周在大陸報章發功，隔河指桑罵槐，除了愛國報章扮傻詐懵當無事發生，全世界都說誠哥劍尖遙指一男子。所以全城起哄，吶喊助威，對誠哥的講話幾乎全盤收貨，但仔細一看，誠哥的貨有問題喎。
譬如誠哥話，「地產霸權」之說是「一個笑話」，話「香港地價高，已看不到健康趨勢」。
由天價拍得土地、再以癲價出售房屋的地產商口中說出「香港地價高」，簡直像收緊十幾萬歐羅周薪的C朗埋怨球員薪酬太高唔健康、AV女優話情慾戲太暴露對心智唔健康，一樣咁好笑。
誠哥如果你都知地價太高唔健康，有無考慮唔起啲咁貴嘅樓呢？或者好似四叔咁，話會起啲一百萬三百呎嘅經濟適用房照顧吓市民呢？至少，帶頭唔好囤埋咁多土地推高樓價啦。
誠哥又話，「香港地產市場一直由政府政策主導……並非由地產商決定，因此地產霸權並不屬於地產商。」呢句真係好笑到無朋友，大捉字虱。
讀稿嗰個當然係政府啦，但邊個寫稿呢？邊個有份起草內容、左右大局呢？
政策有無傾斜地產商呢？譬如誰毋須招標便得到數碼港貴重地皮呢？停建居屋減建公屋，還不是為了托市救地產？點解直至最近政府先出招規管樓宇銷售嘅不當宣傳手法？點解市民硬食咗「實用面積」、「建築面積」呢兩樣搵笨招咁多年？誠哥你夠膽話，地產商無影響過政府？
即係等於賭波集團話，黑哨唔關我地事，因為吹哨子嗰個係裁判；政改方案唔係阿爺主導㗎，因為宣布落實政改係特區政府……香港人，你信唔信啊？