信不信由你，泰利（右）原來都係個有情有義嘅人。冇錯，幾年前爆出「勾義嫂」醜聞而轟動球壇嘅英格蘭隊長泰利，當年因為偷食國家隊隊友布歷治女友，盛傳不設防後畀錢安排女方墮胎，可以稱得上係「世紀賤男」。車仔後衞加利卡希爾（中）唔知係咪想為形象盡毀嘅好拍檔洗底，指出自己2010年患上血栓症，陷入人生低潮時，收過泰利嘅一封信。卡希爾話兩人素未謀面，但泰利寫信問候兼鼓勵，令卧病在床嘅自己好感動。
康復之後，兩人同年被徵召入「三獅」大軍，就一見如故，成為場上最佳拍檔。其後卡希爾更加盟車路士，對隊長泰利有讚無彈：「佢不但有大將之風，而且過去10年，中堅位置上冇人比得上佢，我哋喺英軍同車路士亦好合拍。泰利無論場內場外都具存在感，係個不折不扣嘅領袖。」據英國《太陽報》講，兩位守將已經喺國家隊同球會合作上陣26場，其中保持14場不失球。
卡希爾講到好似為泰利賣命咁，只怕佢真心換絕情咋。雖然好色唔代表泰利唔係好人，但所謂一次不忠，百次不容，未見過都咁有心寫信問候？令人不其然懷疑泰利心中有鬼，偷食過或者想偷食人妻！話晒卡希爾都家有嬌妻㗎。 文：呂晨
以女性角度看球星新聞，唔用眉筆用原子筆寫低球壇百態！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange