傳統英國波就是要膽正命平，勇往直前，大Sam哥的槌仔幫，麻甩味濃，看得人心花怒放，睇好波點止講排名計成績！
筆者約10年前已首次到烏普頓公園球場，看他們在英冠主場迎克魯，見過現在仍列正選的中場工兵麥克盧保；今次第3次「踩場」，這間東倫敦球會外貌跟風格像一切也沒變過，波飛印刷也簡單，問過官方商店內買波衫後排隊印字的球迷，要印的仍是効力近10年的盧保；對戰的「兩咸」開季成績不佳，排在下游，槌仔幫又非鬥傳統死敵米禾爾或熱刺，就算是倫敦打吡搶護級3分，上周六臨場仍有波飛賣。
變身吉祥物旺槌仔
但來到今次英國睇波之旅尾2站，幾已認定下次再來英國，睇聯賽氣氛好過盃賽，睇英式粗線條足球，韋斯咸有大Sam哥仍屬英超首選；3:0大炒富咸完場，只證明水鬥水，無謂講腳法講悅目，正如隊長路蘭賽前在官方場刊說：「我們只能自己救自己，這類比賽冇得縮。」
韋斯咸不像阿仙奴的大都會足球，後者講成績也要娛樂遊客球迷、也非史雲斯的「鎮仔波」，就連當地讀大學的港人也以「趁墟」心態，有半價飛就一窩蜂到場。只見烏普頓場內外大部份人如筆者，成熟人士居多，後生仔少，黃種人更少之又少；頸上掛上一條球會頸巾，代入成為資深槌仔球迷，與他們在場內同喜同悲，麻甩足球好快撻着。
坐在筆者兩旁的大叔，見主隊一直失機，由開波呻到上半場完結，我問其中一人下半場主隊贏波的機會，他一臉悲觀：「真的不敢說，今場不勝，艾拿迪斯聽炒，希望你帶給我們好運！」原來坐在他們一班「街坊」球迷間，筆者一身遊客look變成「吉祥物」；好在下半場甫開波主隊即破悶局，與一眾原來愁爆的槌仔麻甩擊掌、擁抱，氣氛好到不得了。
拳拳到肉好不刺激
大Sam足球，從以前教保頓成功在於簡單直接，到現在贏輸也拳拳到肉，在窄場踢快速側擊為主要殺着，皮球也不時在烏普頓上空飛來飛去，爭頂頭槌，好不刺激；遺憾高大中鋒安祖卡路爾長唞，馬里的邁加當箭頭衝刺稍欠，傳統英國波威力未盡現。可幸中場3人路蘭、盧保及迪亞美硬橋硬馬，截斷客軍大部份進攻，也讓對手另外兩位老牌中場柏加及薛維爾被比下去。之後兩位主隊老「高爾」後備入場又有波入，懷舊之夜在主隊全場23次攻門12次中框3個入波的歡呼聲中結束。筆者與一眾麻甩握手道別，他們更叮囑筆者下次再來，旺吓主隊！
3季後，韋斯咸將會搬到奧運球場作主場，屆時大場打體力化英式足球，不划算，何況英超領隊如車輪轉，大Sam哥難捱到2016年；不過若然屆時各球場閘口多幾位兜售獎券支持球會青訓的靚女，升呢踢大場的韋斯咸，又點只得我等麻甩入場？
文：蘋果波神
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange