最近有媒體報道港人移民台灣數目上升，本來唔係乜嘢大新聞，大家談論此話題，目的志在發洩對梁振英上台後亂局不滿。但在內地眼中就屬政治問題，無理由台灣可以成為香港人移居地，於是便煞有介事由黨報系統發炮，指出有關移民台灣港人數字不正確，而跟手香港特區新聞處就呼應，發出準確數字以正視聽。本來是一宗小新聞，新聞處根本唔需要發稿澄清，出稿目的自然係要配合內地宣傳口徑，這證明中港融合已到了天衣無縫境地。
講開無縫對接，梁鳳儀在物色到繼任人後離職，就稱為「無縫對接」，真係幾搞笑。梁鳳儀之後表示，自己早在梁上台後已經準備請辭，即係唔睇梁台戲，但點解佢又故意留低做多成年幾呢？當然唔係畀面梁振英，而係畀面北京。梁當選仲未埋班，中央已敲定財金系統官員全部留任，由財爺鬍鬚曾、陳家強、陳德霖組成鐵三角，點解？當然係為中央贒實梁振英金融改革大計。
當時梁有心將香港財金政策大權集於一身，設立副財政司，已搵定陳茂波上任，志在奪財政司權，另設金融發展局，當初構思係具法定權力機構，目的係奪金管局陳德霖權，主導政府盈餘儲備投資，如果計劃成功，梁之內交大計便有足夠子彈，內地各省市邊個唔想引入港府投資，港口、機場、鐵路、航天城、乜城物城郭富城，一大堆計劃書排住隊畀梁振英審批，到時邊個敢唔聽話。
但螳螂捕蟬，黃雀在後！首先改組大計無厘頭差一票先被立法會財委會否決，副財政司一職開唔成，跟手金發局梁邀請國企大孖沙入內，以為可借機發圍，點知做嘢粗疏唔細心，公務員用一招利益申報做理由，監生將金發局downgrade成為吹水諮詢組織，最近發表六份報告書，除咗其中一份報告批評佔中損害經濟，稍稍引起傳媒報道外，其他完全冇人理。
至於另一壇經濟發展委員會，同樣雷聲大，雨點極小，到此，梁之金融改革大計已全部打柴，梁鳳儀也可功成身退。
財金鐵三角牢不可破
梁鳳儀係金管局攞命陳隻馬，陳出任特首辦主任時，引薦佢入政府做第一批副局長，任志剛退休後，陳德霖回朝坐正，調番自己隻馬返金管局亦好正常，而接替梁之人亦屬金管局系統出身，合作絕無問題。呢次調動，亦顯示出財金鐵三角仍然係牢不可破，梁振英要伸手入內，難矣！幸好，麥齊光下馬後，畀陳茂波有機可乘，出掌發展局，下管地政、屋宇署兩大部門，揸住地產商要害。
樓神趙國雄早前慨嘆長實（001）新盤攞唔到滿意紙，冇得賣樓，跟手李超人就發表人治論，麥齊光下馬，畀機會陳茂波入位，可見有權在手幾咁重要。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange