新地（016）與公益金合辦嘅「勇闖ICC-100——新地公益慈善跑」噚日第二年開跑，新地老闆郭炳聯舊年hea跑一層，今年就同阿哥郭炳江一齊用半粒鐘跑上100樓，可惜公關唔畀傳媒喺終點影相，大家睇唔到兩位郭生行到喘晒氣個樣，只見開跑前嘅「英姿」。
今屆跑樓梯除咗精英、接力、個人賽，下晝新增「滿fun體驗賽」，兩位郭生、新地「樓神」雷霆、董事陳國威玩呢場，志在參與。據聞，兩位郭生好認真，喺教練陪同下，上月抽咗一日試跑一次，噚日嘅成績比試行好少少。
雖然年過60，但郭炳江都幾有信心，起跑前氣定神閒做熱身，原來佢每日都運動半粒鐘，之前仲專登喺健身室跑樓梯機練習。睇佢大小腿兩截色，平日真係有做戶外運動喎！
半句鐘跑上100樓
郭炳聯就承認做唔到其他選手咁，鬥快跑上100樓，但可以玩吓體驗版嘅「垂直馬拉松賽」，挑戰2,120級樓梯都幾好。佢話，平時都好鍾意行山游水減肥，可惜好多時食得太多，瘦唔到，只可以羨慕啲精英跑手咁苗條。
最終郭氏兄弟、雷霆、陳國威以半小時完成挑戰。
今次活動籌得600萬元善款，吸引超過30個國家同地區共1,019名參賽者，部份來自金融界。有參與接力賽嘅德勤代表隊，當中三位兩周前先跑完毅行者，任職審計師嘅周思仲跑過五年，佢話跑樓梯精神辛苦啲，要集中注意力，平日跑山就可以望風景！
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange