綽號「籃球之神」嘅山貓班主米高佐敦（MJ），今年4月同耶維蒂拉埋天窗，舉行盛大婚禮，日前美國爆料網《Terezowens》流出波神老婆大肚相，仲話佢兩個嘅小朋友好快就會出世！希望小佐敦大個之後，唔會好似佢同父異母嘅哥哥馬加斯佐敦咁冇用啦。
今年7月先傳出波神可能會為咗耶維蒂，「通」番結紮咗嘅輸精管，不過睇相佢老婆個肚好鬼大，真係好似就嚟生得咁滯，Terezowens仲話小朋友就快出世㖭！咦？咁條數咪錯晒？唔通波神真係為咗老婆「通」番，而且係結婚前嘅事！睇番兩個行禮張相，又真係睇唔出耶維蒂有咗身孕，只可以話呢位古巴裔模特兒keep得好好，而50歲嘅MJ婚後一擊即中，認真有心有力！
哥哥馬加斯陀衰家
小佐敦係仔係女、幾時出世就未知，淨係希望佢唔會好似佢哥哥馬加斯咁，波又唔打，淨係識得四圍生事，搞臭波神個朵。上年馬加斯喺內布拉斯加州飲大咗生事被捕，之後仲退出埋佛羅里達州中部大學校隊。唔「繼承」父業打籃球都算，仲要喺自己twitter「晒雀」，又自爆唔夠秤喺賭城拉斯維加斯賭錢。而小佐敦另一位哥哥謝菲佐敦都已經退出咗校隊，波神一族已經冇人打波，小佐敦可能係MJ「王位」嘅最後繼承人！
Kanye West寸爆：係我着紅AJ
另外，波神嘅好兄弟柏賓日前同老婆拉莎慶祝感恩節，佢兩夫婦仲同拉莎老友、卡戴珊家族嘅阿Kim同歌手未婚夫Kanye West一家人過節㖭。講起自大狂Kanye West，真係唔可以唔提佢同Air Jordan嘅關係。已經轉咗同「三間牌」合作嘅佢，日前喺一個訪問中話，自己當年同「一剔牌」合作最後不歡而散感到好沮喪，仲暗寸「一剔牌」忘恩負義，話都係多得自己同經理人成日着AJ，AJ先會到𠵱家都仲咁受球迷歡迎喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange