歡迎大家又嚟到我哋呢個虛構嘅英超冇獎遊戲節目嘞，咁每個星期我哋都會出題目考吓大家嘅眼光，今個禮拜嘅題目就係……放心唔係估邊隊會攞聯賽冠軍咁虛無飄渺，亦唔係競猜男人四十嘅傑斯不老之謎，而係好殘忍嘅邊位係下一被炒嘅領隊，呵呵！
為咗增加大家嘅分析能力，我哋今日節目好榮幸能夠請到兩位大熱門上嚟同大家見吓面，咁佢哋都一請就到喎，梗係啦，仲唔上嚟分分鐘下個禮拜已經炒咗啦嘛，哈哈，呢吓唔好X我住，主持人係講呢啲啦。
「先訪問呀韋斯咸嘅Big Sam先生，你家陣都幾濕滯喎，最近5場主場攞1分咁大把，係咪掛住第日搬去奧運球場，提早放棄自己個主場之利呀！」
「冇計，可能係因為我哋啲球迷成日掛住玩肥皂泡，搞到個場濕濕滑滑，鋪鋪跌到自己友攤攤腰。」
「咁都關球迷事？好，咁你無啦啦整個無鋒陣出嚟又搞乜呢？係咪向西班牙致敬呢？」
「靈感到啫，佢哋西班牙無鋒陣就因為班中場入波多過啲前鋒，咁我哋呢就因為根本無前鋒囉！」
「你認為安祖卡路爾復出嘅時候，你仲喺唔喺韋斯咸呢又？」
「Sorry，假設性嘅問題我唔答。」
「算數，咁又問吓波亞斯嘞，你驚唔驚今晚輸埋畀曼聯嘅話就炒得呢？」
「我一啲都唔驚!等我話你知，熱刺輸畀曼聯係宿命，今晚輸少過兩球我哋都會慶功，其實熱刺不嬲都係盃賽專家，我嘅目標好鮮明，就係歐洲足協盃，其餘嘅嘢都係你哋諗多咗。」
「你啲前鋒麻麻哋喎！」
「錯，我最重用嘅前鋒係迪科爾，我專登畀佢淨打盃賽唔踢聯賽，錫住佢啦。」
原來係咁，呢兩隊嚟緊兩個比賽日將會分別對尾3嘅富咸，如無意外，一星期內就會有一位領隊被炒魷魚，咁你估係大Sam、波亞斯定係祖爾呢？估中冇獎。文：KEYMAN
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange