吳千語除了對事業有團火，原來有時對男友都會發火，她自問性格急躁，遇上事情不順心即無明火起，千語一旦竧𣉢起來，即使平日視她如BB萬般痛錫的男友都冇面畀，幸好男友對她容忍力強，千語也深明情侶間要互相磨合，就算雙方有拗撬，她都不捨嗌分手。
撰文：比華利
不少雙十年華的少女仍沉醉發白日夢，但同齡的吳千語卻名利雙收，事業愛情兩得意。她去年跟男友林𥧌合作電影《男人如衣服》時，兩人火速撻着，已愛得難捨難離。男方更不怕醜公開高呼七次好愛千語ＢＢ，「吳七愛」也甜笑接收。
從前男女藝人都介意戀情公開，時移世易，粉絲已接受偶像有另一半，千語即使做媒體訪問，也不介意把男友掛嘴唇邊，並樂得把戀事公諸同好。千語和男友人前人後糖黐豆，即使再甜都有苦澀時，她大方說：「情侶相處幾好都有嗌交，我話我哋冇就呃你，我哋鬧交都係一陣火。」千語形容每次火勢都輕微，只要雙方忍讓便可迅速撲滅，她更自爆導火線往往因自己急躁性格而起，千語坦言：「主要係我太心急，一急就容易竧𣉢，有時遇上時間趕，我都會竧𣉢，好彩我哋大家都克制唔嗌交，亦唔會話要分手。我相信每對情侶都要經過一段時間磨合，先可以互相了解，呢啲都唔算嗌交。」
「我冇公主病」
年紀輕輕的千語，處理感情事表現成熟，可是經驗豐富之故？她否認：「我拍拖經驗唔多㗎，可能見得人多，聽過好多朋友分享拍拖啲嘢。即使唔係情侶關係，我都唔想同人有爭拗，嗌交係會影響心情，搞到自己唔開心又何必呢？情侶間要畀機會大家去了解，去互相遷就。我又唔係對方肚裏面條蟲，唔講又點會知對方想點，無論工作上對同事，屋企對家人，我係會乜都講出嚟，唔啱講到啱。」
千語是家中獨女，入行後獲經理人錫到燶，男友也待她如珠如寶，不過千語仍然獨立，她否認外間指有公主病：「我真係冇，有時出街買咗好多嘢，身邊男仔幫手攞都係正常，我冇逼佢，男友同我拎又話我公主病，佢唔拎又話佢冇男士應有紳士風度，點講都得。」
對於不時傳出婚訊，千語強調不急於出嫁：「我得20歲女咋，媽咪都係40幾歲，佢都唔會催我。」千語直認曾憧憬30歲前披嫁衣，但入行後思想改變了，她說：「我𠵱家要推後到30幾歲先結婚生仔，不過我贊成有仔趁嫩生，我唔想日後同仔女有代溝。」千語坦言即使婚後仍會繼續演藝事業：「圈中好多例子，靚靚（袁詠儀）就係啦！」千語與男友年齡差距達14年，她向男友派定心丸說：「男仔唔怕啦，幾多歲結婚生仔都冇所謂。」
湊狗忙到癲
愛情得意的千語，大可專心事業，她希望拍齣好戲，問到想演甚麼角色？千語貪心說：「我乜都想試，打女都好，但練拳、功夫要花時間。我最想有機會參演寫實電影，演一啲好生活化嘅人物。」千語想了一會說：「我好想演單親媽媽，𠵱家好多後生仔女好早結婚又離婚。」
千語笑言曾試過媽咪不在家時，獨力照顧過愛犬，她指這個經驗很像單親媽媽，並說：「我相信自己可以投入到個角色，有次媽咪唔喺度，我既要照顧自己，又要照顧狗仔，一邊煮嘢畀自己食，一邊又要餵狗仔食嘢，同幫佢執屎兼陪玩，其實照顧狗仔同人仔真係冇分別。嗰日我忙到癲咗，攰到死，湊完狗仔整日，我唔使一分鐘就可以瞓着。」
化妝：Jan Chan（Annie G Chan）
髮型：Kenki Lau（Queen's Pi）
服裝：I.T、Carven
足本收睇《亂噏24》x謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24