感恩節（Thanksgiving Day）係北美大節日，NBA都好識做，周四冇安排比賽，等班職球員可以同家人玩吓溫馨；但人在客途就冇咁方便，好彩熱火同湖人兩隊嘅大佬，分別出地方同出錢，等隊友開心過節。
熱火周三作客完騎士，由於周五繼續作客速龍，所以大軍唔會返邁亞密住，好彩「大帝」勒邦占士效力騎士期間買落間大屋，可以畀眾隊友落腳食大餐兼開P。雖然大帝之前俾隊友取笑入廚經驗淺，唔知佢整嘅火雞掂唔掂，不過睇保殊喺Instagram自post嘅食物相，都拎咗大大塊火雞，睇嚟味道應該唔 差。另外大帝太太Savannah仲親自下廚整傳統甜品紅絲絨蛋糕，單係呢個心意都冧爆啦。
同樣身處作客旅途嘅仲有湖人，剛以4,850萬美元高薪同球隊續約2年嘅拜恩，就唔搞咁多花臣，淨係喺底特律book個酒店宴會廳，請隊友食番餐。食飯前拜恩仲同隊友玩欖球，食飽飽後又打番場乒乓波，似乎傷勢好得七七八八。
除咗飲飲食食，傳統上聯盟都會安排球員行善回報社會，好似溜馬、雷霆等，都喺地區搞食堂請低下階層食餐好；大衛韋斯、韋斯卜克等球星化身侍應送餐，認真感人。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange