張智霖（Chilam）今年9月過檔蕭定一旗下中國3D數碼娛樂有限公司，佢想喺電影同樂壇上再展拳腳，Chilam前年喺紅館舉行咗兩場演唱會，佢食髓知味，明年7月頭會再殺入紅館，有指Chilam呢次準備開三場，製作費仲會高達500萬。
半空飄浮
Chilam獲悉檔期扑槌後即開始構思，佢噚日喺電話度話：「7月係暑假，同學們放暑假，我希望演唱會好似派對一樣，大家入嚟有魔幻感覺。我初步構思玩刀鋸美人，小型魔術變畀屋企人睇，要變畀成萬觀眾睇嘅話，一定要大型啲。」Chilam會想鋸邊位美人？佢改口話：「不如都係我俾人鋸，分開兩截，我飄住半空同大家唱歌。」佢仲賣關子話會碌卡邀請神秘嘉賓撐場，包保觀眾有驚喜。
Chilam稍後仲會錄製新唱片，預計明年初推出，會翻唱多首經典金曲，包括陳奕迅嘅《歲月如歌》、梁朝偉嘅《你是如此難以忘記》、草蜢嘅《永遠愛着你》等，單係呢啲金曲版權費已花約50萬，Chilam仲話翻唱別人嘅歌唔怕貨比貨：「《歲月如歌》出嚟口碑令我有信心，我包保令原唱者唔失禮啦！」
撰文：馮仁昭
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24