【中環歌賦街】一向爭取同志平權嘅趙式芝，前日出咗本叫《相信愛》嘅散文集，下晝喺中環搞咗個新書發佈會，搵咗好朋友傅明憲、戴妮廷同陳祉妤撐場。到夜晚，式芝嘅另一半楊如芯（Sean）幫佢係中環歌賦街嘅Gough40包咗間房，幫佢慶祝之餘順便同一班好朋友過感恩節。
呢間餐廳平時都好多名人藝人幫襯，早排先影到周星馳帶咗位女士喺呢度包房嘆紅酒晚餐。而前晚到場嘅好朋友包括王馨平、傅明憲同男友莊家彬、陳祉妤等30人，仲有人送咗紮花畀式芝。佢哋大概8點鐘陸續到場，場內不停傳出開紅酒同開香檳聲，前後都開咗成20幾支紅酒，香檳都10幾支。場內氣氛非常高漲，特別係身為主人家之一嘅Sean顯得最high，先後喺場內攬住傅明憲條腰傾偈，又不停向人敬酒，去到稍後時間已經見Sean不勝酒力。
餐飯大概食到11點幾完場，式芝同賓客擁抱道別。單拖出席嘅王馨平最先上咗部七人車離去，莊家彬同傅明憲一齊上咗部Benz房車，返咗干德道嘅寓所。
Sean攬女狂啜
飲到醉晒嘅Sean喺門口不停同人擁抱，其間仲攬住一名中年女士錫面，呢個時候式芝驚佢失儀，所以同該名女子夾手夾腳想送佢上車，不過Sean好似小朋友咁，賴死糾纏咗成分鐘先肯上車，仲要式芝好似𠱁狗仔咁摸佢頭話：「Good girl！」一上到車，Sean已經爛醉咁撻喺後座，式芝就好細心扶好佢，先至叫司機開車離開。
採訪、攝影：黃曉程、梁繼光
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24