球壇年少成名嘅球員多不勝數，但早熟早殘嘅例子更多。好似傑斯咁踢足廿幾年，到噚日佢40歲生日都仲可以喺頂級聯賽打滾，就真係少之有少。撇開私生活不談，40歲傑斯喺球壇成就實在斐然，我求大俠都要向你致敬！
25年前一場有電視直播嘅校際盃賽決賽，當時有一位未夠15歲嘅𡃁仔賴恩威爾遜（Ryan Wilson），帶領沙爾福特喺晏菲路球場以3:2擊敗布力般封王。雖然威爾遜冇波入，但每一球都係由佢助攻，表現冠絕全場；呢位小朋友冇耐之後棄用威爾遜呢個爸爸姓氏，改用媽媽姓氏「Giggs」示人，即係今時今日鼎鼎大名嘅傑斯（Ryan Giggs）。
34個冠軍見證輝𤾗
歲月流逝，雖然傑斯𠵱家已經唔再係曼聯每場比賽嘅必然正選，亦難再好似昔日咁喺左路快上快落，但傑斯喺球場上嘅專業精神依然不變，周三歐聯分組賽作客5:0炒利華係傑斯40歲生日前夕，3字頭嘅最後一場比賽，正選上陣兼踢足全場，表現幾鬼出色，冇得頂！
傑斯喺90年代初出道，同碧咸、史高斯加埋尼維利兄弟等呢班「92一代（class of 92）」，歷年嚟幫曼聯贏盡大小錦標，傑斯到今日一共贏咗34個冠軍，包括13次頂級聯賽錦標，都係英超球員紀錄嚟。對於佢嚟講，足球生涯最大遺憾可能係從來未成功帶領威爾斯國家隊打入國際大賽決賽周；但佢一直強調冇後悔過選擇威爾斯。
出道至今一共952次代表曼聯上陣，傑斯亦話其實成功得來不易，一直以嚟要對自己的身體非常約束：「我有時都會妒忌身邊人可以大吃大喝，佢哋飲紅酒，我就只可以飲水，悶就一定㗎啦。朋友喺夜晚去蒲，我就要早啲去瞓，但作為職業球員就要做好自己。」
雲格都讚佢精靈
傑斯球場上嘅成就，亦贏得對頭人嘅尊重，阿仙奴領隊雲格話：「或者因為傑斯冇參加過世盃同埋歐國盃，令外界對佢職業生涯嘅評價冇咁高；但我可以講佢嘅成就實在非凡，𠵱家踢到40歲仲可以繼續喺頂級聯賽生存，當中嘅轉型唔係人人可以做到。」
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24