無綫封殺壹傳媒，不讓旗下藝人接受壹傳媒訪問，廣告客戶為免影響宣傳效益，近日紛紛轉軚改用其他藝人，繼Sony PlayStation臨時起用陳靜（DaDa）取代無綫藝員高海寧後，下月中的「微博用眼看港澳」活動原定邀請巨聲幫出身的吳業坤配港姐朱千雪代言，但日前已被換走，改由聲音似足黎明、有「黎零」之稱的楊尚斌（Ben）和參演電影《靚妹仔2013之微交少女》的許雅婷（Kabby）頂上，周秀娜兩名師弟妹黎零及Kabby合力踢走無綫藝人。
黎零：能者居之
黎零及Kabby成功搶飯碗後，昨日在澳門為該宣傳活動進行拍攝工作，負責該活動的廣告公司Vie發言人Damon昨日在電話中說：「客戶畀咗好大壓力，佢哋話搞活動係想得到最大宣傳效果，如果有啲傳媒唔訪問得，不如索性換咗個代言人，所以我哋最後揀咗黎零同Kabby，佢哋一樣好專業。」
Kabby及黎零昨日化身導遊大使，介紹澳門的必去景點，Kabby昨日在電話中說：「我好少睇電視。好開心多咗job，多謝客戶畀機會我，最好多啲再搵我哋。」黎零昨日也說：「呢個job係公司呢兩日先叫我哋做，客戶揀中我哋，證明我哋都可以做好呢個job，真係能者居之。」
採訪：林妃
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！