今年係百變天后梅艷芳逝世10周年紀念，馮仁昭收到消息，梅姐紀念音樂會定咗喺佢死忌12月30號假會展舉行，負責統籌嘅係阿梅生前契妹夫張學友，音樂會分兩部份，一部份係由好友同徒弟唱歌致敬，另一部份係影圈朋友上台分享梅姐生前軼事。
歌影好友齊撐
學友同梅姐感情深厚，除咗佢會唱歌悼念外，據知梅姐生前摯友劉德華都答應獻唱，聽講有情有義嘅華仔寧願台北騷唔加場，都要趕返港懷念阿梅，但譚詠麟因一早接咗工作，呢日好可惜嚟唔到悼念，不過梅姐嘅後輩郭富城、陳奕迅同鄭秀文都會出一分力獻唱，日前陳奕迅接受電話訪問話：「偶像學友叫到我幫手，梅姐嘅事應該要出力，佢唔止係出色歌手，電影都好成功，應該要表揚。」當然唔少得梅姐一班徒弟何韻詩、許志安、草蜢同蘇永康等，大家誠心演唱紀念梅姐。
至於影圈好友方面，梁朝偉、劉嘉玲同成龍都會上台講感受，大會仲邀請緊周潤發、楊紫瓊同張曼玉出席，仲會聯絡梅姐生前舊愛近藤真彥同梅媽，希望大家都抽空出席，而門票善款就捐畀兒童癌病基金同香港癌病基金，大會請埋會計師核數，以釋梅媽同公眾疑慮。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！