上季玩完馬後炮，今季就做預言家，同大家一齊睇吓呢周有咩好睇。今日傾咩：波亞斯夠唔夠班教熱刺？
【咖哩篇】上輪聯賽俾曼城炒完6球，真係冇人夠膽幫波亞斯（圖）講番句好說話。批評從四方八面而嚟，由今季買埋啲廢人返嚟，數到佢上次教車仔教到眾叛親離。小弟覺得波亞斯絕對唔差，任何領隊都試過俾人大炒，費格遜都輸過1:6啦！熱刺今季咁多新人，請大家畀啲時間波亞斯。
大家話佢用咗一億鎊買埋啲廢人返嚟，但佢其實思路好清晰。熱刺一直冇頂級前鋒，佢買蘇爾達杜；波亞斯想踢4-3-3陣式，所以買咗可鋒可翼嘅拉美拿；佢想踢前場緊迫，所以買咗荷西保連奴同伊天卡普爾呢啲體能充沛嘅中場。波亞斯每筆簽約都係圍繞佢建隊嘅思想，問題係一次過嚟太多人，球隊需要時間去消化。
唔少人會質疑波亞斯上季只係靠加里夫巴利，但小弟認為就算隊波有個勁人，你都要識用先得。波亞斯將球隊嘅戰術訂為巴利模式，安排巴利踢前場自由人，力求將呢位威爾斯球星嘅威力最大化。巴利可以入咁多波，波亞斯嘅戰術都有功勞。數番佢教波圖嘅前一季，球隊喺葡超排得第3，但波亞斯一接手後，嗰季就以21分嘅優勢、不敗姿態奪葡超冠軍。能夠令一隊波喺一個夏天登上聯賽頂峯，波亞斯係有兩道板斧㗎。
雖然大家聽咗波亞斯個名好多年，但佢其實只係得36歲，喺教練界嚟講，佢經驗唔算好多。領隊呢份工，重經驗多過天賦，等波亞斯儲多啲經驗，畀時間佢建立屬於佢嘅熱刺，佢一定唔會令大家失望。文：咖喱
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24