順誠（531）點只11厘高息吸引，佢主打家具業務，食住美國復蘇及祖國城鎮化，預測PE亦非常吸引。博順誠升九成，未有耐追到同行敏華（1999）1年以嚟近4倍嘅升幅。
順誠係全亞洲三大實木傢俬製造商，兼英、美十大傢俬批發商之一。今年上半年，順誠實際純利6,045萬銀，增長37%，而主打嘅美國區，下半年嘅新屋銷售數字好省鏡，睇嚟順誠家具業繼續有運行。
食住中產倍增條水
另一瓣酒店家具業，順誠係以「非常可觀增長」去形容。專業評估，祖國嘅中產人數，三幾年後將會倍增到6億人。全球酒店業磨拳擦掌，大力發展，順誠呢瓣業務一樣爆炸。又順誠祖國收入，佔得總收入2%，基數好低。祖國城鎮化開鑼，順誠食住呢條水，亦一樣不得了。
順誠啱啱發咗公告，話取消投標收購Furniture Brands。咁睇，順誠家陣應該係吼緊好嘢買，而集團淨現金連極高流動性資產，高達16億銀，銀彈勁多係優勢，睇準時機再出擊，亦大大加強日後嘅搵銀能力。
估順誠今、明年度EPS增長50%，分別升到7.7仙及0.116元，明年度PE得9.8倍。
另一邊廂，美國巨無霸Home Depot（市值8,860億港銀）炒美國樓市復蘇，預測PE達到18倍。祖國嘅浙江永強，同樣以出口為主，預測PE去到20倍。
又順誠現價（1.14元）較07年5蚊高位大跌近80%，PB得0.84倍。上邊Home Depot，PB高達8倍，敏華PB亦過3倍。順誠現價殘到爆，升90%到2.17元，PB得1.5倍，預測PE 17倍，亦未追到行家。
錢 雋
細價股專家
本欄逢周二、五刊出
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24