李超人接受《南方都市報》訪問，在訪問中回應了敏感問題，包括大賊張子強、撤資及地產霸權等。表面上雖然冇直插梁振英，但提到政府選擇性行使權力，若有所指。佢話：
「健康社會中政府與企業的關係是息息相關的。關鍵是政府的權力要在法治的基礎上公平公正地落實執行政策，香港不能『人治』，永遠不能選擇性行使權力。」
「自由開放的市場，重視『原則』和『法治』，兩者皆來之不易，但如果管治失當，也可以一夜之間蕩然無存。」
超人講法，正正擊中梁粉政府要害。梁當權以來，一夜之間變得冇規冇矩，唔單止商界頂唔順，一般市民更加多怨氣。
梁粉們經常掛在囗邊的一句說話：「點解唔得？」認為政府內部太多規範，阻礙梁特首以香港速度去施政，十幾個月來，東搞搞、西搞搞，美其名成熟一項推出一項，實際就章法全無，處事草率粗疏。英治時代留下一套行政程序規範，係明知香港政府不受民意約束，所以從內部建立一套自我監督程序，確保施政水平及良好管治。
在基本法框架中，特首權力好大，欠缺制衡，即使決定違反民情、立法行政兩會主流，仍然可以朝綱獨斷，呢個漏洞成為走向人治珉床。英國留低好多係不成文規定，而非行政法規，特首一人便足以推翻。以電視發牌為例，若特首不同意局方建議，係要重新再走一次有關程序，唔可以一人話事就改變遊戲規則。
缺民主監督 香港規矩脆弱
香港特首權力不受制約，另一原因係北京對政黨政治仍存戒心，特首乃打單泡一支公，背後冇政黨。黨有自己一套政策綱領及倫理操守，係另一個制衡特首工具。但𠵱家各司局長向特首負責，而特首就向北京負責，除共產黨外，不受任何政治力量制約。梁振英可以選擇唔跟規矩辦事，大家都奈佢唔何。
至於對商界而言就更大劑，好似屋宇署對付唐英年僭建，所動用人力物力之多，實屬空前，有否選擇性執法，大家有眼見。至於同政府打交道更多嘅地產商，更容易受不同鬆緊執法力度所影響。本來，公務員按本子辦事，係香港制度優勝之處，𠵱家變成特首一人可推翻官員決定，試問邊度有信心可言。
人治，係中國人政治特色；法治，本來係香港政治特色。人治壓倒法治，政治考慮取代原則，就係香港制度崩潰之始，梁振英上台，香港人終於明白，欠缺民主監督，香港一度賴以成功嘅一套規矩，現實上何其脆弱，一夜之間整個玩法就可改變。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange