網隊喺今季花天價人工簽巨星返嚟，諗住染指NBA總冠軍，但就搵個冇執教經驗嘅傑特嚟做教練，可能貪佢夠醒目有急才。網隊喺周三常規賽主場迎戰湖人，臨完場隊波已經用晒暫停，傑特靈機一觸，疑似特登叫球員倒瀉佢杯冰茶，喺清理期間助教就乘機同班兵面授機宜。可惜奸有奸輸，網隊最後都以94:99輸波。
網隊輸埋畀湖人之後，今季打咗15場已經輸咗11場。佢哋喺今季成日領先之下俾對手從後追上嚟，今仗主場迎戰湖人就幾乎相反，湖人一度領先27分，網隊喺下半場大反擊，比賽剩番8.3秒嗰陣，只係以94:96落後。
派助教偷雞傾戰術
當時網隊用晒暫停，趁湖人嘅米爾斯射完第一個罰球之後換人；就喺呢個時候，傑特一副戇居居模樣，揸住杯冰茶喺場邊行嚟行去，突然俾T泰萊撞到，杯茶倒到成地都係。呢邊傑特叫人抹番個地，另一邊助教就叫啲球員埋嚟講戰術，球證見勢色唔對即刻趕班球員返去。比賽繼續，米爾斯入埋第2個罰球，皮雅斯處理最後一擊失手，最終湖人贏99:94。
疑叫T泰萊撞埋嚟
有專家睇重播話傑特呢個舉動係特登嘅，佢嗰陣對住T泰萊話「Hit me（撞落我度）」，真唔真就大家估吓，但當事人誓神劈願咁否認，傑特賽後話：「當時戰況緊湊，我都冇理到手上杯嘢。」做球員嘅梗係識做，T泰萊賽後都強調呢單嘢純屬意外，傑特冇叫佢撞埋去。
網隊兩老加尼特同皮雅斯喺今仗分別拎4分同12分，祖莊遜19射6中拎全隊最高嘅18分，之但係球隊始終都係贏唔到，再係咁落去莫講話總冠軍，季後賽都唔知有冇份打。周五網隊就要作客剛有林書豪輕傷但應可趕及上陣嘅火箭（now635台明日9:00am直播），睇吓到時傑特仲有咩急才啦。
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24