美國本周數據參差，新申領失業救濟金人數落番去兩個月低位，反映就業市場續改善，雖然20大城市樓價錄得逾七年最大按年升幅，但按月計升幅放緩，顯示按息趨升影響下，樓市復蘇力度減弱。其他諸如消費信心及製造業等數據有起有落，所以美金呢個禮拜走勢，就因應唔同國家嘅經濟消息而走，兌歐元同英鎊就處弱勢，兌澳元加元等商品貨幣就呈強。
隨時放水 歐元易升難跌
上個禮拜有個別歐洲央行官員提到可能出動負利率，去應對通脹過低及經濟放緩問題，但該行「頂爺」、行長德拉吉本周出嚟補飛，話無意推出負利率，加上德國總理默克爾終於同其他黨派傾掂數組大聯盟政府，掃除9月大選後嘅政治陰霾，歐元本周走勢唔差，兌美元曾升穿1.36美元。由於德國經濟唔差，只要經濟不景氣未燒到埋身，德國佬勢必阻頭阻勢，央行短期未必出動負利率。
不過，若然區內低通脹問題下，央行應會諗計放水，加上聯儲局應該就快開始縮減買債，歐元仍係易跌難升，但要食糊就可能要多點耐性。
英鎊呢個禮拜幾叻仔，兌美金曾逼近1.64，創近今年高位，除咗上季經濟維持0.8%增長、創逾兩年佳績呢個利好因素外，來自楓葉國、有央行界Cool魔之稱英倫銀行行長卡尼，早兩日借題發揮，埋怨政府統計局做嘅經濟數據好鬼流，反映唔到經濟好轉勢頭，話同祖家加拿大嘅質數差幾皮，俾人落面嘅統計局就扮晒鵪鶉。
佢呢番言論，多少反映政府之前低估咗復蘇動力，雖然卡尼又做人肉錄音機，重申無意提前加息，但市場唔係好信，英鎊自不然有支持。
日圓淡倉多 慎防反高潮
伊朗同西方六強國就核問題傾掂數，緩和市場對中東局勢嘅緊張情緒，油價應聲向下，市場擔心打擊加拿大石油出口業，加元前日就跌到逾四個月低位，美元高見1.603加元。
澳元同紐元其餘兩隻商品貨幣，澳元繼續俾央行干預威脅言論打壓，曾跌到落90美仙邊，兌紐元更跌至逾五年新低。不過，市場覺得澳洲央行只係出口術，入市干預機會唔大，加上澳洲息口應該見底，澳元兌美元短期下跌空間應該有限，兌紐元交叉盤應該一如之前所講，仲有得跌。
本周匯市焦點，首選當然係日圓，對歐元同美金都分別跌到4年同半年新低，照睇美元兌103日圓嘅目標價應該好快到，能唔能夠突破103.74嘅5月高位，就要睇市場會唔會繼續risk on。雖然好多人估日圓出年跌到110，但家陣日圓淡倉已升到六年高位，加上技術指標顯示美元少少超買，不排除近日惡化嘅中日關係，會觸發淡友先行止賺。
奇兵
本欄逢周五刊登
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24