為咗孫仔孫女，李嘉誠原來都可以去到好盡！話說一位超人下屬向《南方周末》爆料，日理萬機嘅超人，原來每星期都會變身教師，同一班孫兒「上堂」享受爺孫樂；由道德文化到世界經濟再到何謂風險都會教授，好多時仲要以生動演繹吸引孫兒注意，難得係超人對此樂此不疲，唔知佢有冇教幾個孫，富貴只係如浮雲？
扮鬼扮馬樂此不疲
現有七個孫仔孫女嘅超人，好着緊呢班心肝椗。據佢下屬透露，近三年超人每星期都會變身教師，自己準備好課程甚至案例，同班孫仔孫女上堂。教啲乜嘢？範圍好廣泛，除咗道德討論，亦有文化批評同世界經濟。如果有教香港歷史，唔知超人有冇教埋自己穿膠花發迹嘅奮鬥史，身教孫仔孫女？
據聞為咗教班孫乜嘢叫風險，超人甚至花8,000美金，印咗四張AIG股票出嚟，仲將股票裱起，象徵呢間咁大規模嘅保險公司喺金融危機中爭啲破產嘅事，仲寫埋「以此為鑒，以惕未來」，而當時，佢嘅孫仔孫女只得幾歲咋。
咁深嘅嘢，細路點聽得明？超人竟然有法寶。據呢位下屬話，超人會刻意演繹得好生動，仲要難度好高嗰種，而超人對於要扮鬼扮馬教孫，據聞佢樂此不疲。
另一個跟咗超人十年嘅下屬就話超人好鍾意睇電影，睇戲時嘅代入感仲好強，每次都會揀一個佢至like嘅角色，隨住劇情起伏過佢哋嘅生活喎。
mailto:[email protected]
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24