上周五推介的包裝食品飲料生產商天喔（1219）在大市回吐下，昨仍能力挽狂瀾，接近全日最高位收市之餘，亦同時創了新高，短短一周即到價可喜可賀，眼見其他內需股全數破頂，唔等錢使不妨放吓紙鳶，除了炒半新股和A、H差價之外，好似炒天津自貿區和燃氣概念的天津津燃（1265）或者係一個好選擇。
天津濱海新區政府昨將自貿區列入明年工作重點，港口概念早已起動，先前推介的東北地區最大的綜合性碼頭營運商大連港（2880）亦相繼炒起，其實基礎建設同樣受惠，天津津燃在天津和內蒙提供管道燃氣銷售、輸送以至接駁等服務，上半年受惠於內房回暖，接駁服務收入增21%，一旦國務院拍板，住宅項目更多，接駁服務定單接到手軟。
三中全會提到天然氣價格市場化，阿爺希望提高天然氣產量，加速天然氣在發電和供暖方面替代煤使用，令到一眾燃氣股過去幾日發力衝，津燃行得最慢。
年中因華潤管理層舉報案和母公司前董事長金建平因涉中石油案嚴重違紀後，股價好快見底，昨日一口氣突破橫行格局兼升穿250日線，成交亦創半年最高，近日各地轉冷，發改委預警今年天然氣供需矛盾繼續嚴峻，相信於「氣荒」下，燃氣股正值受寵之時。
Samantha
本欄逢周一、三、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange