上季玩完馬後炮，今季就做預言家，同大家一齊睇吓呢周有咩好睇。今日傾咩：波亞斯夠唔夠班教熱刺？
【牛腩篇】摩連奴成功，搞到歐洲出現一輪少帥潮，好似馬體會嘅施蒙尼，史雲斯嘅米高勞特立；熱刺領隊波亞斯，出身嘅道路同摩連奴都好似，葡萄牙籍，波圖出身，但領軍嘅功力，真係差天共地。
講真36歲嘅波亞斯，就真係有啲似摩連奴傳人咁，喺車路士同國際米蘭跟隨過寸王，又同樣幫波圖拎3冠王，不同之處係摩連奴贏歐聯，波亞斯贏歐霸。但波亞斯冇做過正式職業球員，球員交流就唔及得摩連奴亦柔亦剛。好似11年波亞斯初當車路士領隊，以為得到油王撐腰，就公然同班老臣子搞對抗；最搞笑係車仔入波後，波亞斯要求隊員同佢慶祝，心理脆弱嘅程度，同689搵班金毛飛嚟支持佢不遑多讓。結果教咗7個月，波亞斯就俾車仔炒咗，最瘀皮係車仔一眾舊人由迪馬堤奧領軍下，贏埋12年歐聯㖭。
波亞斯冇料到，熱刺仲喺12年開季搵佢頂替哈利列納做新領隊；熱刺係就係上季爭啲拎到前四，歐霸盃入埋8強，但始終都冇咩隊型，好多場比賽都係靠加里夫巴利一命救全家，由輸變和，或由和變贏。今季巴利走埋，熱刺成隊當堂唔知踢乜，波亞斯唔係冇錢買人，高價買埋蘇爾達杜、拉美拿（圖）、荷西保連奴等人，基本上巴利收番嘅天價轉會費使凸有餘，但奈何球隊依然冇組織。蘇爾達杜過去係就係西甲入球率高，但都係打反擊為主，要佢做柱躉打單箭頭，根本唔啱佢。之前仲話靠防守可以悶悶哋贏，上仗對曼城真係過足癮輸，靠冇板斧嘅波亞斯，熱刺今季都幾難執番好。文：牽牛
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24